Жыл құтты болсын!

Батыстағылар, әсіресе Маңғыстаулықтар Наурыз мейрамын ерте тойлайды. 14 наурызда, ия, дәл бүгін әулеттің барлық балаөшағалары жиналып, қара шаңыраққа (үлкен үйге) «КӨРІСЕ» келеді. Босағадан аттаған бойда «ЖЫЛ ҚҰТТЫ БОЛСЫН» десіп, қолдарын беріп, төс айқастырады.

Барлық ағайын-тума жиналған сәтте үлкен үйде Наурыз көже қайнатылып, абыр да сабыр болып дәм татады. Кейін көрісе келгендер, бір-бірінің үйін аралай бастайды. Ағайынның жиналатын үйі біздің отау. Әлі күнге дейін біздің үйге жиналып, азан қазан болып жатамыз.



Бала кезімде әке-шешем Амал келген күні ерте оятып алатын. Таңғы бесте ұйқымды қимай, оянғым келмей жатқан сәтімде ата-анам «Наурыз келген күні ерте тұру керек. Аяз ата далаға шашу шашып кетіпті. Аспаннан бауырсақтар мен кәмпиттер, сағыздар түсіп жатыр. Кім ерте тұрса, соған бұйырады. Ояныңдар, ырыс-несібелерің көп болады» дейтін. Шашу деген сөзді естіген сәтте, төсегіңнен қалай атып тұрғаныңды, далаға қалай жүгіріп шыққаныңды білмей қаласың. Қарасаң ештеңе жоқ!!! Әйдәәә, сосын бас кеп айқайды!!! «Далада ешқандай шашау жоооқққ! Мааамммааа! Өтірік айттың» деп отыра қап жер тепкілейсің. Сосын әкем (өзі қулау кісі): «Таңертең кім ерте тұрса, соған бұйырады дедім ғой саған. Көршінің балалары теріп алған ғой.Ерте тұру керек еді» дегенде аузымды аша алмай қалуыш ем.
Сол кезде, неге таң атпай оятады? деп түсінбейтінмін. Сөйтсем, Наурыздың атқан таңының өзі әсерлі болады екен. Ата-анам арайлап атқан таңның шуағын көрсін, Наурызды сезінсін деп ерте оятатын көрінеді. Сол кезде ештеңе түсінбейтін сәби бүгінде, әрбір Наурыздың таңы атқанда, ұясынан көтеріліп келе жатқан күнмен бірге сол балалық шағын есіне алады.

Бүгін де ағайын тума жан жақтан жиналып, әңгіме дүкен құрып, Наурыз көже ішіп жатқан болар. Шет жақта жүргенде Амалдың күнін қатты сағынады екенсің!

Айтаберліктер, Жыл құтты болсын!

Суреттер ғаламтордан алынған