Блогшылар Құрылтайы хақында

Піссіміллә деп бастайық!
Ар ма ағайын!!!

Негізі бұл пост үш күн бұрын шығу керек еді… Алайда мынау шайқатылған дүниенің пендияуи тірліктері мойын бұрғызбады… Ол үшін кешірім… Яғни, үш күн кешіктік деген сөз…

Постты оқуды жалғастырмас бұрын мына сілтемеге өтіп, құрылтай жайында жиі қойылатын сұрақтармен танысып алуларыңызды өтінемін. Ол — құрылтайдың официалды сайты. Алдыңғы өткен құрылтайдың қалай болғандығы, қалай басталғандығы, қалай біткендігі жөнінде, онан басқа да көптеген сұрақтарыңыз бойынша мәліметтер ала аласыздар.

Енді құрылтайлар тарихына кішкене көз жүгіртсек. Ең алғашқы құрылтай (мен ол кезде болғаным жоқ, тек естідім) Асхат Еркімбайдың ұйымдастыруымен Алматыда өтті. Ең алғаш блогшылардың басын қосып кеткен, алдында тек монитор артынан ғана тілдесетін блогшыларды реалда жолықтырып, тілдестіріп және де ең бастысы достастырып кеткен осы шара болды. Егер қызықсаңыздар ол жайындағы мағлұматтарды гуглдатып отырып-ақ тауып аласыздар.
Екінші құрылтай Астанада былтыр 22-наурызда болып өтті. Оған қатысу бақыты мынау алдарыңызда клаваны тықылдатып отырған пенделеріңізге де бұйырды. Оның негізгі ұйымдастырушылары Астаналық блогшылар, үйлестірушілікті өз мойнына алған Талғат Байназаров деген жігіт болды. Атап өтейін, өте жоғары деңгейде ұйымдастырылды.
Мынау алдағы келе жатқан құрылтайдың да тағдыры жартылай (баса айтамын жартылай) сол жерде шешілді. Мен де өз кезегімде өз Шымкентімнің патриоты ретінде :)) ұсынысымды білдірдім. Алайда бұл ұсыныс толыққанды БЕКІТІЛГЕН ЖОҚ. Сондықтан біздің жоспарлап отырған тірлігіміз 180 градусқа теріс айналып кетуі мүмкін. Негізі оны ұйымдастыру жағынан да тәжірибесі бар және де мықты потенциалы бар блогшылардың басы қосылған Алматылықтар «Бізде өтсе» деген тілек айтып жатыр. Әрине дұрыс. Ол жерде өтсе еш қиналмайсың. Барлығы төселген бағдарлама, жоспар бойынша сәтті өтеді.
… Алайда, (айй осы бір сөзді жақсы көрем шыы) менің пікірімше бір қалада өте бергеннен гөрі әр жылы әр қалада өткен қазақ блогына көбірек пайдасын алып келетін сияқты. Жаңа блогшылар қосылады. Адамдардың қызығушылығы оянады деген сияқты…

Неге бұл пост «Айтаберде» жарияланып отыр?

деген сұрақ әрбіріңіздің көкейіңізде тұрғаны анық. Өйткені,
1) Жағырапиялық орналасуы сай келгендіктен. Бұл тұғырдың орталығы — Шымкент.
2) Жоғарыдағы пункттен шығатын себеп — негізгі салмақ «Айтаберліктерге» түседі.
3) Мұнда жастар көп. Ал, жастар өздеріңіз білесіздер, қоғамның қозғаушы күші.

Сондықтан да координациялық орталық Айтаберде болғаны дұрыс сияқты. Мынау қауымдастық та осы үшін ашылды. Осы жерде барлық мәселелерді талқылап, шешіп, ұсыныс тастап… Тек дайын өнімдерді ғана Құрылтайдың ресми сайтына салып отырамыз.

Неге ерте бастан дайындық жасап отырмыз?

Негізгі дайындық желтоқсан айында басталады. Қазіргі дайындық сол айтылған негізгі дайындыққа мықты тұғыр орнату үшін, мығым платформа орнату үшін қажет. Дәл қазір глобалды мәселелер шешіп тастаймыз деп айта алмаймын. Оған әлі уақыт жеткен жоқ. Алайда, логотип деген сияқты, бір көргенде ұсақ-түйек, бірақ кейін көп уақыт алатын мәселелермен осы бастан айналыса беруге әбден болады.

МЕНІҢ ОЙЫМША БІЗДІҢ ҚОЛЫМЫЗДАН КЕЛУ КЕРЕК!!! Потенциал бар. Тек жоспарлы, бір бағытта, айқай-шусыз келісім мен ымырашылдықта жұмыс істесек болды.
Әзірге осы. Ұсыныстарыңыз бен тілектеріңізді, сұрақтарыңызды қоя отырыңыздар!