Лондон Олимпиадасындағы қызықты деректер
* Лондон әлемде Олимпиаданы үш рет өткізген алғашқы қала болып тіркелді.
* Олимпиада кезінде қауіпсіздік шараларын бақылау үшін 900 млн. доллар жұмсалып отыр.
* Жеңімпаздар мен жүлдегерлер мойнына тағатын медальдің салмағы – 400 грамм. Мұндай салмақ бұған дейін Олимпиада тарихында болған емес.
* Дүбірлі додаға 204 елден 10 мыңнан астам спортшы қатысады. Ең көп спортшыны жарыс қожайындары ағылшындар (541) қосып отыр.
* Олимпиадаға қатысатын спортшылардың 97 пайызы дүбірлі додада небәрі жарты сағатқа жетер-жетпес уақытта өнер көрсетеді екен.
* Олимпиадада тұңғыш рет барлық спорт түрінен қыздар сайысқа түседі.
* ХХХ жазғы Олимпиаданың ең қарт спортшысы – жапондық Хироши Хокетсу. Ат спортынан сынға түсетін 71 жастағы қария қазіргі таңда бабында екенін айтып, медаль үшін күресетінін жеткізіпті.
* «Тұманды Альбионда» тұңғыш рет аяғы ауыр әйел жарыс жолына шығады. Дәрігерлердің айтуынша, нысана көздеуден сынға түскелі отырған малайзиялық Нур Саряни Мохаммед Таиби 2 қыркүйекте босанады.
* Олимпиада қалашығында бір мезетте 1500 адамды қабылдай алатын ең үлкен мейрамхана салыныпты.
* Киімсіз жарыс өтіп жатқан алаңға шығып, жұрттың назарын өзіне аударған адам, мемлекетке 20 мың фунт стерлинг көлемінде айыппұл төлейтін болады.
* Лондонда 18,2 мың әскер, 6 мың күзетші, 12,5 мың полиция жарыс өтіп жатқан 30-ға жуық спорттық нысан мен 70-ке жуық қонақүйді және автотұрақтарды бақылайтын болады.
* Ұлыбритания ханшайымы II Елизаветаның немересі Зара Филлипс Ұлыбритания құрамасының сапында ат спортынан күміс жүлдегер атанды.
* Майкл Фелпс Лондонда бір алтын, екі күміс алғаннан кейін Олимпиаданың 9 дүркін чемпионы, 5 дүркін күміс, 4 дүркін қола жүлдегері, атақты КСРО спорт гимнасшысы Лариса Латынинаның 48 жыл бойы медаль саны бойынша бұзылмай келген рекордын бұзды. Фелпстің Олимпиада медалінің саны енді – 19-ға жетті. Өз кезегінде Майкл соңғы үш Олимпиадада 15 алтын, 2 күміс және 2 қолаға қол жеткізіп үлгерді. Енді ол алтын саны бойынша да, жүлде саны бойынша да рекордсмен атанып отыр.
* Олимпиаданың бесінші күнінде әлемнің 47 елі 66 медаль жиынтығын өзара бөлісті. Оннан астам Олимпиада рекорды тіркелген. Оның екеуі ауыр атлеттеріміз Зүлфия Чиншанло мен Майя Манезаға тиесілі.
19 пікір