Толғаныс

***
Арқалап алып сағынышымды ғасырлық,
Ақ арманымды сәруар сезіммен асыл ғып.
Болашақ саған жете аламын ба жырыммен
Жете алмаймын ба көшіңе жолдан қосылдық.

Жә, ол да емес, балаңның тіпті арманы
Жанымда жырың, жадымда әнің қалмады.
Ауызыма қарап, алдымнан күткен жандарға
Дұрыс сөз айтып, жөн сілтей алсам болғаны.

Бүгінгі жырдың бағасын берер біз емес,
Тағдырда мына болып жатады мың егес.
Ұрпаққа айтар ақылың егер болмаса
Ұрандап жазған романдарың түк емес.

Бір бірімізді жерлеп жатамыз сөзбенен,
Жөндеп жатамыз жанашыр болсақ тезбенен.
Қырық үйіңнен қызыңа тию болмаса
Не қайыр, аға, сөйлегеніңмен мінбеден?

Жанарымыздан жүргеніменен жас тайып,
Тағамыз осы бір бірімізге босқа айып.
Қияметке дейін көш бұзбай жету үшін де
Түзелу ісін шаңырағымыздан бастайық.