Оралмас жастық

Сағымға сағынып қарармын.
Тұман да түншығып тұрармын.
Келмеске кеткен жастығым,
Мен сені жоғалтқан шығармын.

Ұлықтың ұранын ұғармын.
Ұлғайып, үн-түнсіз тынармын.
Қимастық сезімі қыдықтап,
Амалсыз басымды бұғармын.

Жастықтың жанарын жығармын.
Сезімді құрғатып сығармын.
Уақыттың еркіне көндігіп,
Өмірдің ырқымен ығармын.

Тебіренген көңілді тиярмын.
Қалайша жастықты қиямын.
Сол кезгі тәтті сезімді,
Жүректің түбіне жиямын.

Уақыттың еркімен көшермін.
Дауысын сағындым еркемнің.
Жалынды, жігерлі жас өмір
Шынымен жоғалтқан екенмін.