Шымкентте алғаш рет «Домбыра Party» өтті

Жастар «Тәуелсіздік» саябағына жиналды
«Домбыра party»- шым қалада бұрын-соңды болмаған іс-шара. Алғаш естігенде кім келер деп ойладық. Десе де, белсенді жастардың бастамасымен танысуға арнайы бардық. «Тәуелсіздік» саябағына жиналған жастардың қатары қалың емес. Бірақ қолдарында қазақтың қара домбырасы. Күмбірлеген даусы, бірден өз тыңдаушысын баурап алды. Ұлттық өнерді дәріптегендердің қатары да артты, көрермендерде де көптеп жиналды.
Күмбірлеген күй көрермендерге шабыт сыйлады
Әдеттегідей ұйымдастырушысын іздедік, бірақ мұндағы жастардың арасында ұйымдастырушы жоқ. Игі бастамына бастаған да, идея ұсынған да өздері. Осылайша, жастар арасында қазақтың қара домбырасының қадірін арттырмақ. Несі бар, қауантарлық жәйт.
Ғабит Сапарбеков жырын арнады
Көрермендер дән риза
Күмбірлеген күй, айтылған жыр жиналғандарға көтеріңкі көңіл-күй сыйлады. Көктемнің кешінде жиналған жас толқын ауа-райының суықтығына да қарамай, домбыраны жарыса шертті. Естігендер кеш болса да, топқа келіп қосылып, өнерін көпшілікке паш етіп жатты. Солардың бірі қаламыздағы оқу орындарының бірінің бірінші курс студенті Нұрдаулет Ілесбек. Ол «Домбыра party» боладыны естіп, арнайы келген домбырасын арқалап.
Агенттен естіп келгендердің бірі-Нұрдаулет
Белсенді жастардың игі бастамасы көпшілікке ұнады
Нұрдаулет Ілесбек: «Мойындау керек, кейбір жастар домьыраны менсінбейді, түсінбейді. Бірақ, менің ата-анам әр қазақтың төрінде домбыра ілулі тұру керек деп үйретті. Содан болар, әуестігім артты. Арнайы барып, сабақ алған емеспін. Бірақ, әуелете ән сала аламын. Өзімнің ортамда домбыраны ала жүремін».
Садық Шерімбек, ұйымдастырушылардың бірі
Садық Шерімбек, блогер: «Бір қызық болып жатқан жәйт, Астана әлі бастамай тұрып, Шымкент қаласында осындай игі іс-шара басталып кетті. Алдағы уақытта домбырашылардың қатары көбейеді деп 100 пайызға айта аламыз. Өйткені бүгінгі шараға қатты дайындалмасақ та, келушілер бар. Мақсатымыз салт-дәстүрді дәріптеу. Аз болса да қазір бастап отырмыз. Келесі жолы домбырашылардың қатары бұдан да көп болады деп ойлаймыз».
Домбырашылардың қатары
«Домбыра party» ұлттық аспаптың құлағында еркін ойнайтын жастар мен ұлттық рухта тәрбиеленгендердің басын қосатын шара. Бастамасы жаман емес, сондықтан жалғасын тағы күтеміз. Ұйымдастырушылардың сөзіне қарағанда, қаламыздағы барлық саябақтарда осы іс-шара жалғасады. Осы сенбі «Қиял әлемі» саябағында өтеді деген жоспар бар.

Отырар TV сайтынан алынды