Жарысқазан

Біздің қазақ халқында салт-дәстүрлерімізбен қатар ырым-жырымдарымыз да аз болмаған. Оның салт-дәстүрге қарағанда айырмашылығы қатаң сақтау талап етілмеген, адамдардың еркіне салынған. Егер қаласаң, сенсең ұстан, болмаса өзің біл дегендей. Бірақ негізі жақсылық тілеуден, жәрдем күтуден туындағандықтан күні бүгінге дейін қалмай келе жатқандықтары өте көп, ол үшін адамдарды жазғыруға да болмас деп ойлаймын.Сондай ырымдардың бірі жарысқазан туралы жаза кетейін.
Жарысқазан (ырым). Әйелдер босанар сәтте ауылдағы абысын-ажындары қазанға жеңіл желпі тамақ істеп оны босанатын әйелден бұрын пісірмек болып «жарысады». Халық ұғымы бойынша туатын бала «жарысқазанға» қатысып, одан бұрын өмірге келуге тырысады деп түсінген. Бір қызығы әйелдердің жақсы ниет, ыстық ықыласынан болар, бұл ырым көбіне өзін ақтап отырған деседі әжелеріміз. Әйел босанған соң сол істеген тамақтарын ортаға салып, жас ананы құттықтап, дастархан жаятын болған.