Сүйсіндірген "Ер Төстік пен Айдаһар"...

Қазағым қызықты мультфильм шығара алатынын дәлелдеді бүгін. Езуіміз жиылмай тамашаладық. Расында, дауыстары да өте келісті, қазақилықтан, шүкір дейік, кенде емес дүние екен. Бір-ақ сағаттық мультфильм шетелдің ешбір мультфильмінен кем емес. Ерлік те, махаббат та, әзіл де бар. Сценаристің ертегіде жоқ болса да, мульфильмге қосқан Тасбақасы мен Қосаяғы да өте сәтті шыққан. Дап-дардай болсақ та, балаша күліп, мәз болып отырдық. Тағы бір ұнағаны — «Бапы Ханның жаңалықтар көретін кітап іспеттес элетронды құрылғысы» мен «Жалмауыз кемпірдің айна іспеттес айпады»)))

Енді сізге, жалпы бүгінгі күннің кереғар жағын айтайын. Кассаға жақындап, билет алғалы жатқанымызда, кассир қыз "Қазақшасы бұл, бола бере ме?" деп 2-3 қайтара сұрады. Сонда қалай, орысшасы болса — бәрі дұрыс, қазақшасы — дефект пе, бірнеше рет нақтылап сұрайтын? Бұл — бір! Екіншісі, кинозалға кіріп қалсақ, 10 шақты бүлдіршіннен өзге ешкім де жоқ. НЕГЕ? Осы сұрақ керней берді мына кеудені. Бірінші қазақ үшін мақтаныштан жарылып кете жаздайын деген жүрек енді ұяттан жарылып кете жаздады. ҚАЙДА ЖАСТАРЫМЫЗ? Қазақы нәрсені көргенде ат тонымызды ала қашып жөнелетініміз несі? «Мадагаскар» шыққандағы зал әлі есімде менің. Бүгінгі залдың антонимі ол…
Мені жұбатқан жалғыз нәрсе — бізден кейінгі қатарда отырған бүлдіршіндердің мультфильмге айтылып жатқан пікірлері болды. Оларға ұнады. Бастысы — сол! «Мәәә, Көлтаусарға базар жоқ екен, иә?» әйтпесе «Мен де папаға айтам Ер Төстіктікіндей сауыт-сайман әпер деп»… Спайдермен, Бэтмен, Супермэндердің орнын Ер Төстік дәл осылай басып кете берсе ғой дедім. Тек Ер Төстік емес, ертегі боп, аңыз боп, аты халық аузында қалған батырларымыз көп қой біздің. Солардың барлығы туралы сапалы кинофильм, мультфильм, комикс, тағысын тағы шығарса, балапандарымыз көрмейді емес, көреді ғой. Бірақ ол балапандарды да кинотеатрға ертіп әкелетін ата-ана керек. Бүгінгі ата-аналардай. Оларға шын жүректен РЭСПЕКТ!
Осының барлығын айтып, саралағаннан кейін мынадай ой келеді: «Мультфильм бюджетін ақтай ма екен?» деген. Қазақ үшін аянбағандардың еңбегі өз дәрежесінде бағаланса екен. Ол бюжет ақталуы үшін кинозалдар бүгінгідей бос тұрмауы керек қой. Күрмеуі көп, күрделі мәселелерді шеше алмасақ
та, тым құрығанда осындай ұлт үшін игі дүниелер шыққанда, солардың куәсі болайық та, жастар…

Ер Төстік



Кенжекей


Таусоғар, Желаяқ және Көлтаусар


Жылан Бапы Хан


Бекторы (Бапы Ханның қызы)


Жалмауыз кемпір


Шойынқұлақ (Жалмауыз кемпірдің ұлы)