Ұрлық түбі - қорлық

Жазда бір жақсы велик тептім. Сапасы керемет енді, ұнады. Бір басып қойып, ұзаққа дейін барасың. Жылдамдығының түр-түрі бар, тормыздары «дисковый». Аузым беріктігіне қарамай жұмысқа қиналмай барып-қайтатын едім. Бір демалыста қаланың арғы шетінде тұратын ағамдікіне қонаққа баратын болып, тура есігімнің алдына подьезде батареяға байлап кете салып едім. Келсем, өз көзіме сенбедім. Велик жоқ. Телефонмен айтқанда онша сеніңкіремегем. "Қалай?" деген сұрақ санамды жей берді. Ол менің затым ғой. Өте түсініксіз жағдай да, біреудің затын иемдену. Қандай оңбаған адам болу керек. Әлі күнге дейін осыған дұрыс ашуланғаным жоқ. Ол кісіге деген аяныш сезім ғана бар. Ұрлап жатқанын елестетіп көрем, бір жігіт, қап-қара, байланған шынжырды терлеп-тепшіп ысқылайды. Ешкім көріп қоймасын деп жан-жағына жалтақтайды… Аянышты бейне… Қателік еткенін мойындар, затымды қайтарар деген үмітпен ертеңіне сол велик тұрған орынға «Побойся Аллаха воровать в месяц Рамазан. Верните мой велик» деп жазып, астына тел/e-mail қалдырып кеттім. Одан да нәтиже шықпады, көп ұзамай ол жазуды да біреулер жыртып кетті. Қандай ұры-қылмыскер болмасын, күнә адам жанына дамыл бермейді ғой. Бүкіл әлем сені кінәсіз деп ойлағанмен, ішіңнен біліп тұрасың, жаның жай таппайды. (Достоевскийдің «Преступление и наказаниесіндегідей») Сол ойлаймын, кісі ұрлығына өкінген болар, бірақ, сатылып кеткен великті қайтара алмай жүр. Бәлкім, күндердің күні қайтарып қалар. Қош, велик, бұйырса, келер жазда жаңасын алармын…

Жұмыс барысында кейбір программаларды заңсыз түрде қолдана береді екем. Студент кезде прогаларды бұзу қызық болатын. Содан бері қалып кеткен әдет пе, әйтеуір, онша мән бермейді екем. Негізі, бұл да ұрлық қой. Біреудің маңдай терімен жасаған еңбегін, тегіннен тегін ұялмай, рахаттана қолданасың. Ұрлықтың ұрлықтан айырмасы жоқ. Қазір, жағдай келгенше тегін, лицензиясы бар программаларды қолданатын болдым. Құрметті достар, компьютеріңізге жаңа операциялық жүйе, қолданбалы программалар орнатқанда мұқият болайық. Ешкімнің ала жібін аттамауға тырысайықшы…