Еркіндік туралы ой

Өз ойым /
Бір атжалманым(хомяк) болған. Өзі сондай дамылсыз еді. Үнемі торынан шыққысы кеп, күні-түні тыным тайпайды жүргені. Үстінен қарап тұрып, аяп кететінмін. Байғұс атжалман-ау, мен көріп тұрмын ғой, мына тордан өлсең де шыға алмайсың. Одан да көнсеңші қатал тағдырға… Жоқ, тоқтамайды. Кейде «Бар, еркіндіктің дәмін сезіп қайт» деп жіберіп қоям. Бөлмеде ойқастап алай да, былай зыр жүгіреді. Қуанышында шек жоқ. Кәдімгідей жанар оты жарқ-жұрқ етіп, әрнені тінтіп бір рахат күй кешеді дейсің… Бірақ, сәлден соң ұстап алып, қайта қамап қоям. Осымен тоқтай қойса жақсы ғой, кірген бойда қайтадан тырмыса бастайды. Темірді тістелемей ме, секіре ме… Мынауыңда, шынымен бір грамм ақыл жоқ шығар деп ойлайсың. Саналы түрде жасап жатыр ма кім білсін, негізі, жасап жатқаны өте дұрыс екен ойлап қарасам. Нәтижесіз болса да, қолынан келгенін барынша жасады. Соның себебінен, оны аяп кеттім. Аямасам сыртқа шығармас едім, ол еркіндіктің тәтті дәмін татпас еді.

Бәлкім, біздің де үстімізден Жаратушымыз дәл осылай бақылап тұратын болар. Біз де бір нәрсеге ұмтылып жатамыз. Егер берілмей, көздеген мақсатымызға ұмтыла берсек, Алланың қалауымен, бір күні дегенімізге жетерміз. Әрқашан аспандарыңыз ашық болсын, ешқашан берілмеңіздер. Жақсылықтан үміт үзбеңіз деген тілекпен осы постты аяқтағым келіп отыр.

P.S: Атжалман ақыры қашып кетті. Жаздың күні еді, ауладағы мысықтың бірі қылғытып жіберген шығар. Үлкен өмірде өзін-өзі қорғауға, қорегін тауып жеуге дайын емес еді ғой. Мүмкін, бір жерде күнелтіп жүрген де шығар. Көшенің епті егеуқұйрықтарымен достаса алса онда да, ол ақ қой.
Өтініш, торда жәндік-жануар ұстамайықшы. Не жазығы бар еді?

10 пікір

Jako
Тамаша пост екен, негізі белгілі бір ұғымда біздің бәрімізде тордамыз.
AKA
Еркіндік, демократия деп есіргендер қазір көп қой. Сондай кезде қатаң тәртіп болса екен деймін. Фетхуллаһ Гүленнің кітабында еркіндік туралы айтқаны бар еді: «Еркіндік адам үшін «ақиқаттан бір елі ажырамай-ақ, өзге жандарға қылдай қиянатыңды тигізбей-ақ қалағаныңды жасай аласың» деген мағынаны білдірмек. Ең абзал еркіндік – өркениетті еркіндік. Ал өркениетті еркіндік – дін мен шынайы адамдықтың алмас шынжырларымен әдептелген, дұрыс ойлаудың алтын белдігімен буылған еркіндік.»
ereke_enu
Фетхуллаһ Гүленнің кітабын оқуға Діни Басқарма тарапынан тиым салынбады ма? Сөз жоқ, қызықты жазады, алайда, дін жағынан ақида ауытқулары бар. Оқымай қойғаныңыз абзал.
AKA
Тыйым салу жағынан хабарым аздау, кейде дұрыс жолға, бұрыс жолдың бұрыстығын танып келген абзал сияқты. Кеңесіңізге рахмет, есте болады.
AL-ASTER
Жақсы айтқан екен да, бірақ дінге тіреп қойғанына келіспеймін.
ereke_enu
Темір тәртіппен де ешнәрсе шешілмейді…
AL-ASTER
Ar narsening oz shegi bolghany durys siyaqty.
AL-ASTER
Ab93 пікірі маған ұнады өткендегі, типі былай ед: кімде кім әрекет жасаса, Жаратушы тарапынан қолдау болады.
ereke_enu
ия, біздер тек себеп жасаушы ғанамыз. нәтиже 100% Алланың қолында. Сондықтан, тәуекел еткенде де, үміт артқанда да тек Жаратушымызға.
Moldir_96
Жақсы жазыпсыз! Тілектеріңізге рахмет! Сіз сол атжалманды бақылағандай, Алла тағаламыз да бізді бақылап отырған болар. Кейде сынау үшін түрлі қиындықтарға тап болдырады, кейде еркіндікке, бостандыққа жібереді.
Тек тіркелген қолданушылар ғана пікір қалдыра алады.